ԸՆՏԱՆԵԿԱՆ ՓՈՍՏԱՐԿՂ

ԸՆԹԱՑԻԿ ՓՈՒԼԵՐ

«Ընտանեկան փոստարկղ»  մշակութակրթական ծրագիրը  բաղկացած է 3 հիմնական փուլից:

Նախապատրաստական փուլ 

Նախապատրաստական փուլում կազմակերպվում է ուսուցչի այցը թանգարան, կամ վերջինիս հետ նամակագրական կապ է հաստատվում:

Թանգարանի աշխատակիցը ուսուցչին ուղարկում է կրթական ծրագրի ծանոթագրությունը, որին ուսուցիչը պետք է ծանոթանա կարճ ժամանակահատվածում և, հաստատելով մասնակցությունը ծրագրին, ներկայացնի մասնակիցների անվանացանկը: Անվանացանկը ստանալուց հետո թանգարանի աշխատակիցները սկսում են նախապատրաստական աշխատանքները:

• Կրթական ծրագրին նախապատրաստելու համար ուսուցչին ուղարկվում է տեսական նյութ:
• Կրթական ծրագրի համար առանձնացված  և թեման բացահայտող  նամակները հասցեագրվում են՝ ըստ նախապես ուղարկված անվանացանկի (Նամակների և ծրարների արտաքին տեսքը բնորոշ է Թումանյանի ապրած ժամանակաշրջանին):
• Նամակներն իրենց տեղն են գտնում փոստարկղում:
• Ուսուցչի հետ հստակեցվում է փոստարկղի առաքման ժամանակացույցը:

Գործնական փուլ 1

Փոստարկղը դպրոց է ուղարկվում  հատուկ անձի կամ ուսուցչի միջոցով:

Կրթական ծրագրի անցկացման վայրը ընտրում է ուսուցիչը:

Ուսուցիչը պետք է հետևի թանգարանի կողմից սահմանած գործողությունների հերթականությանը, որը ենթադրում է.

1. Արկղի մասին հետաքրքրաշարժ տեղեկատվություն: (Նամակներով լի արկղը ժամանակի մեքենայի միջոցով իր լսարանին մտովի կտեղափոխի թումանյանական ժամանակաշրջան):

2. Արկղը բացող բանալու ցուցադրում:

3. Թանգարանի կողմից կնքված արկղի բացում:

Այնուհետև ուսուցիչը խնդրում է երեխաներին մոտենալ արկղին, որից հետո բացում է այն: Մինչ նամակները հասցեատերերին բաժանելը՝ ուսուցիչը կարդում է մասնակիցներին ուղղված Թումանյանի «հորդորը».

«Ձեզ եմ դիմում, սիրելի աշակերտներ: Նստեցեք, կարդացեք, խորացեք, մի հարցով զբաղվեք… Մարդը լավ բաներով պիտի հետաքրքրվի, հետաքրքրությունն էլ պիտի լուրջ լինի. գեղեցիկ շրջանակի մեջ դնի ու վերջակետին հասնի: Ինչքա՜ն բան կարելի է անել. առաջին քայլն է դժվար, երկրորդն ինքն իրեն կգա»:

4. Թումանյանի «հորդորը» հանդիսավոր ընթերցելուց հետո ուսուցիչը նամակները բաժանում է հասցեատերերին: Վերջիններս  բացում են, կարդում, և սկսվում է ակտիվ քննարկում:

 Նամակների ընթերցումից և քննարկումից հետո ծրագիրը կարող է ավարտված համարվել:

Նախատեսվում է նաև ծրագրի 2-րդ փուլ:

Գործնական փուլ 2

1.Նախատեսվում է ծնողների ներգրավվածություն ծրագրին, որի շրջանակում մասնակիցների հայրիկները, հետևելով Թումանյանի օրինակին, սահմանված ժամանակահատվածում նամակներ պետք է գրեն իրենց զավակներին:

2.Երեխաներն իրենց հայրիկներից ստացած նամակները գցում են փոստարկղի մեջ և այն հետ են ուղարկում թանգարան:

3. Հանդիպման հաջորդ վայրը թանգարանն է:

4. Թանգարանում՝ համապատասխան միջավայրում և մթնոլորտում, կկազմակերպվի  նամակների ընթերցում և քննարկում: